Ана Бунтеска: Биди жена

Биди своја

Кажи НЕ без страв

Дека некој ќе те осуди

И ДА ако срцето така ти вели

Без оглед другите што мислат

Одмини ја кујната ако така ти иди

И не биди роб на домот

Ниту на оние кои во него живеат

Уживај во својот успех

И тогаш кога ти го негираат

Тресни со рака на маса

Тогаш кога има неправда

И крени го гласот до небо

Кога твојот збор е за потсмев

Исправи ги плеќите

Не мора светот на нив да ти лежи

И не се труди да си совршена

Онаму каде што тоа значи покорност

Биди своја

Биди жена која сакаш да ја видиш

Во своето женски чедо ко ќе пркне

Бестрашна и со гордо крената глава

Со образ чист и мирна совест

Оти ниту една битка не ќе ја добиеш

Ако себе се заборавиш попатно

И ако станеш она што не си

Или она што сите очекуваат од тебе

Биди своја

Колку и да боли

Колку и да паѓаш попатно

Колку и колениците да ти крварат

И во устата пцости да ти се прпелкаат

Оти ниту една жена среќна не е

Ако стане сенка од она што навистина е

И ниту една жена не цвета

Ако цврсто по земја не гази

Боса или на високи потпетици

Биди своја

Оти ништо на светот поголема цена нема

Од онаа која ќе ја платиш

Ако си сенка од која ќе бегаш

Ако си буква која глас ќе нема

И ако си лик кој свој одраз нема

Оти во овој свет

Во кој уште молк има

Кога женско дете ќе се роди

Како клетва фрлена од наречници да е

И кој на женското име

Туѓо презиме клава

Единствената борба која треба да ја освоиш

Е да си храбра

Да си своја

Да си жена

За Женски Магазин, Ана Бунтеска