ДОМАШНИ ПОЗНАТИ ЛИЧНОСТИ СО ПОБРОЈНИ СЕМЕЈСТВА: Со три деца дома се претвараш во лавица

Успехот и динамичната работа е она по што јавноста ги знае, но нивниот брз ритам продолжува и по работниот ден, дома. Денес ве потсетуваме на домашните познати личности кои се родители на три деца. Дел од нив, за Женски магазин го споделија своето искуство за тоа како изгледа нивното секојдневие. 

Во ноември 2017 година, министерот за финансии Драган Тевдовски и неговата сопруга Анита добија трета ќерка по двете постари, Ема и Каја. Тевдовски, пред да стане министер предаваше на Економскиот факултет во Скопје, а имал амбиции и стане фудбалер. Неговата сопруга Анита, беше дел од музичката група „Ин“. 

Живкица со Даријан, Марко и Ана 

Водителката на емисијата „Тунел“, Живкица Каленикова и нејзиниот сопруг Зоран се горди родители на Даријан, Марко и на Ана. „Да, навистина имаме убава бројка од деца дома. Во улогата на мајка, верувам се снаоѓам, како и секоја друга, станувате лавица, правите се што сте мислеле дека нема да можете, наоѓате сила да бидете и лекарка и учителка и тешителка и другарка“, изјави Жиле во интервју за Женски магазин.

Наде со сопругорт Ненад и со синовите Максим, Михаил и Матео 

Пејачката Наде Талевска, која е сопран во Македонската опера и балет, неодамна во искрено интервју зборуваше за предизвикот како мајка на три сина: Максим, Михаил и Матео.

„ Тешко е да се опише еден ден, бидејќи со три мали мили ѕверчиња секој ден е толку различен. Понекогаш и во екстреми. Околу чувањето на децата ни помагаат нашите родители, кога има потреба. Во принцип, кога е сопругот на работа ги чувам јас, кога јас сум на работа, татица одлично се грижи и се справува сам со нив. А кога сме во исто време зафатени, или имам некој настап на кој и Ненад сака да присуствува, тогаш влетуваат бабите и дедовците, а понекогаш и некоја од тетките“, изјави Наде за своето семејство.

Ребека со Маркијан и со близнаците Макариј и Доротеј 

Пејачката и претседател на Здружението „Дајте ни крилја“  Ребека Јанковска- Ристески е исто така мајка на три сина: Маркијан и близнаците Доротеј и Макариј. „ Макариј и Доротеј ги сака многу и често доаѓа заедно со мене да ги земеме од градинка. Со нив си игра брканица и криенка, ги гушка и ги бакнува“, раскажа Ребека.

Кошаркарот Перо Антиќ и неговата сопруга Ружица се родители на три сина: Лука, Павел и Петар

Кошаркарот Перо Антиќ и неговата сопруга Ружица се горди родители на три сина: Лука, Павел и Петар. За убавата вест по раѓањето на третиот син, во 2016 година, своите пријатели и навивачи, Перо ги извести преку неговиот фејсбук профил.

Милица Џаровска