Ана Бунтеска: ова не е песна за љубов

не е ова песна за љубовта

ова е песна како да ја преживееш

како после неа умот здрав да ти остане

и срцето да не ти се изрони толку ситно

што нема да може ништо да го залепи

за да пумпа колку-толку

да тупне доволно за да дишеш

и за да можеш да издишеш

не е

не е ова песна за љубов

ич не е таква

ова е песна за како сила да збереш

за сабајле да се разбудиш

и од кревет да се извлечкаш

без да имаш умор ко цела ноќ да си орала

и насила шминка на лицето да ставиш

да заличиш ко да не ти е гајле

да ја намонтираш насмевката

и да се трудиш цел ден да ја задржиш

ова е песна за да се сетиш

да се опоменуваш дека жива си

дека можеш да се движиш

и да говориш можеш

дури и некоја шега да кажеш

иако очите мртви ти се

со црни кругови под коректорот

кој полсаат го мачкаш за да се сокриеш

и да глумиш дека ништо не ти е

дека лошото е кон крајот

и дека после дожд сонце доаѓа

иако твоето е изгасено

или пукнато како стара сијалица

ама немаш воља за да ја смениш

за повторно да ти засвети денот

ова не е песна за љубов

ова е песна за она после неа

како фотографии после војна

разрушено и пусто

со купишта расфрлани тела

и многу бол и јад

кога душата низ пустош ти шета

и се обидува да најде нешто што ќе ја оживее

нешто, било што

за да пркне

за да ти гукне

да ти проговори

еве дури и за да се исплаче

да олесни

да здивне

ова не е песна за љубов

ниту за тебе е

ниту за мене напишана

ова е опело за она после неа

за пустошот после нејзиниот погреб

ова

ова не е песна за љубов

За Женски магазин поетесата Ана Бунтеска

Фото: Стојан Стојановски